ایک عالم کی صحبت کے بڑے فوائد ہیں کہ انسان اس سے بہت کچھ دینی معلومات کے حوالے سے سیکھ کر نہ صرف اسے خود اختیار کر سکتا ہے بلکہ دوسروں کی نجات کا سبب بھی بن سکتا ہے ۔اللہ تعالی کے نیک بندوں کی صحبت میں رہنا چاہیے، ان کی محفلوں میں شریک ہونا چاہئے، اس کے بے شمار فائدے ہیں، انسان تو ظاہر ہے کہ اس سے فائدہ اٹھاتا ہے ،جانور بھی بزرگوں کی صحبت سے فائدہ اٹھاتے ہیں جیسے اصحاب کہف کا کتا ان کی صحبت میں رہ کر ان کے قصہ کا جز اور حصہ بن گیا اور قرآن کریم نے اصحاب کہف کے ساتھ ان کے کتے کا بھی ذکر کیا ہے۔عالم کی فضیلت پر بہت سی روایات منقول ہیں۔بعض کتب میںعالم کے فضائل پر ایک واقعہ آتاہے جسے تحریر کیا جا رہا ہے تاکہ ہمارے دلوںمیں ایک عالم کی قدو منزلت اور اہمیت کا اندازہ ہو سکے۔
اللہ تعالیٰ ایک ایسے بندے سے حساب لے گا، جس کی بُرائیاں اس کی نیکیوں پر غالب ہوں گی تو اس کو دوزخ کا حکم دیا جائے گا۔ چنانچہ جب اس کو دوزخ کی طرف فرشتے لے جائیں گے تو اللہ کریم جبریلؑ سے فرمائے گا کہ ’’میرے بندہ کے پاس پہنچو اور اس سے پوچھو کہ کیا وہ دنیا میں کسی عالم کی مجلس میں بیٹھا ہے؟ تاکہ میں اس عالم کی سفارش سے اس کو بخش دوں‘‘۔ جبریلؑ اس سے پوچھیں گے، وہ کہے گا کہ ’’نہیں!‘‘ پس حضرت جبریلؑ عرض کریں گے کہ ’’اے رب! تو اپنے بندے کا حال خوب جانتا ہے کہ اس نے کہا کہ’’نہیں!‘‘۔ اس کے بعد اللہ جل شانہ فرمائے گا ’’آیا وہ کسی عالم کو دوست رکھتا تھا؟‘‘ وہ کہے گا ’’نہیں!‘‘ پھر ارحم الراحمین فرمائے گا کہ ’’اس سے پوچھو کہ کیا وہ دسترخوان پر کسی عالم کے ساتھ بیٹھا تھا؟‘‘ وہ کہے گا ’’نہیں!‘‘ اس کے بعد اللہ کریم فرمائے گا کہ ’’اس سے پوچھو یہ اس گلی میں سکونت رکھتا تھا جس میں کوئی عالم تھا؟‘‘ وہ کہے گا ’’نہیں!‘‘ پھر خداوندِ عالم فرمائے گا کہ ’’اس سے پوچھو کہ آیا اس کا نام کسی عالم کے نام یا اس کا نسب کسی عالم کے نسب کے موافق تھا؟‘‘ وہ کہے گا ’’نہیں!‘‘ اس کے بعد اللہ فرمائے گا کہ ’’اس سے پوچھو کہ آیا یہ کسی ایسے آدمی سے محبت رکھتا تھا جو کسی عالم کو محبوب رکھتا تھا؟‘‘ پس وہ کہے گا کہ ’’ہاں! میں ایسے شخص سے محبت رکھتا تھا‘‘۔ پھر اللہ تعالیٰ جبریلؑ سے فرمائے گا ’’اس کا ہاتھ پکڑو اور اس کو جنت میں داخل کردو اس لیے کہ میں نے اس کو اسی وجہ سے بخش دیا ہے‘‘۔ سبحان اللہ!