محترم حضرت حکیم صاحب السلام علیکم! اللہ تعالیٰ آپ کو اور آپ کی نسلوں کو دولت، عزت، برکت، رحمت جیسی نعمتوں سے مالا مال فرمائے‘ آپ پوری امت کی خدمت کررہے ہیں اور وہ بھی ایسے وقت میں جب ہم مسلمان دین سے بہت دور ہوچکے ہیں اور اسی وجہ سے بہت سی بیماریوں اور پریشانیوں میں گھرچکے ہیں۔ میں اپریل 2018ء سے عبقری کی قاریہ ہوں ‘مجھے عبقری سے میری ہمسائی نے ملایا۔ ہم لوگ ایک شادی پر جارہے تھے‘ راستے میں دو عورتیں ایک ہماری ہمسائی اور دوسری اس کی سہیلی باتیں کررہی تھیں کہ عبقری بہت ہی زیادہ مقبول ہورہا ہے‘ اس وجہ سے کہ یہ لوگ مسائل کا حل اسلامی طریقے سے حل کرتے ہیں۔ دل میں خواہش پیدا ہوئی کہ میں بھی اس کا مطالعہ کروں‘ چنانچہ میں نے بھی منگوا کر پڑھنا شروع کیا تو بہت سکون ملا۔ حکیم صاحب میں ایک بیوہ عورت ہوں۔ میری شادی میرے کزن سے ہوئی۔ شادی کے صرف آٹھ ماہ بعد میرے شوہر فوت ہوگئے۔ ہوا یوں کہ وہ ٹھیک ٹھاک تھے گندم کا موسم تھا وہ گندم کاٹ رہے تھے۔ اچانک ان کو سردرد ہوا اور پھر بلڈ پریشر ہائی ہوگیا دو تین دن ہسپتال میں رہنے کے بعد وہ ہمیں چھوڑ کر چلے گئے۔ میرے سسرال والے پہلے تو بہت اچھے تھے جب میرا شوہر فوت ہوگیا تو سسرال والے بہت بدل گئے۔ میرے شوہر پر کسی نے جادو کیا تھا۔ میں اپنی عدت پوری کرنے کے بعد اپنی امی کے گھر آگئی۔ وہاں میرے بھائیوں نے مجھے عمرہ کروایا۔ اللہ پاک نے وسیلہ بنایا ورنہ میرے پاس ایک پیسہ بھی نہیں تھا۔ اللہ کا لاکھ لاکھ شکر ہے کہ میں نے تین عمرے کیے‘ بہت سے وظائف کیے‘میرے کریم اللہ نے بہت سکون دیا ۔ میری زندگی میںبہت ساری پریشانیاںلیکن اس کے باوجود میں بہت سکون میں ہوں‘ سمجھ نہیں آتا کہ ایسا کونسا عمل ہے جس وجہ سے میں سکون میں ہوں۔ میں آپ کو اپنے وظائف بتاتی چلوں کہ ہر روز عشاء کی نماز کے بعد دو رکعت نماز نفل پڑھ کر پیارے آقا محمد مصطفیٰﷺ کی بارگاہ میں تحفہ پیش کرتی ہوں۔ جھاڑو لگاتی ہوں تو زبان پردرود ابراہیمی جاری رہتا ہے اور اگر آندھی بھی چل رہی ہوتو کوڑا کرکٹ اڑ کر صاف جگہ نہیں جاتا صبح شام جب بھی یاد آئے درود پڑھتی ہوں اور خاص طور پر کھانے پکاتے ہوئے بھی درود ابراہیمی پڑھتی ہوں۔ سورئہ کوثر سارا دن چلتی پھرتی پڑھتی رہتی ہوں۔ کوئی مشکل ہویَارَحْـمٰنُ یَا رَحِیْمُ پڑھتی ہوں تو فوراً حل ہو جاتی ہے۔