ہر مرض کا مجرب علاج
حضرت محمد بن سماک رحمۃ اللہ تعالیٰ عنہ ایک بار بیمار ہوئے تو ان کے متوسلین ان کا قارورہ لے کر ایک نصرانی طبیب کے پاس بغرض علاج جارہے تھے کہ راستے میں ایک نہایت روشن چہرے والے خوش لباس بزرگ ملے کہ جن کے بدن سے بڑی پاکیزہ خوشبو مہک رہی تھی، انہوں نے فرمایا :کہاں جارہے ہو؟ لوگوں نے عرض کیا کہ حضرت محمد بن سماک رحمۃ اللہ علیہ بیمار ہیں، ان کا قارورہ غیرمسلم طبیب کے پاس لیے جارہے ہیں یہ سن کر انہوں نے فرمایا سبحان اللہ! ایک اللہ کے ولی کے لیے دشمن خدا سے تعاون چاہتے ہو۔ قارورہ پھینک دو، واپس جائو اور ان سے جاکر کہو کہ مقام درد پر ہاتھ رکھ کر پڑھیںوَبِالْحَقِّ اَنْزَلْنٰہُ وَبِالْحَقِّ نَزَلَ یہ فرما کہ وہ بزرگ غائب ہوگئے۔ ان صاحبوں نے واپس آکر حضرت محمد بن سماکؒ سے واقعہ عرض کیا، تو انہوں نے مقام درد پر ہاتھ رکھ کر یہ کلمہ پڑھے، تو فوراً آرام آگیا۔ حضرت محمد بن سماک رحمۃ اللہ علیہ نے فرمایا کہ وہ حضرت خضر علیہ الصلوٰۃ والسلام تھے۔ (خزائن العرفان و تفسیر حسینی جلد اوّل )
کنگھی کرنے کا فائدہ غربت ختم
حضرت ابی بن کعبؓ راوی ہیں کہ حضور رسول کریمﷺ نے فرمایا ’’جو شخص روزانہ رات کو اپنے سر اور داڑھی میں کنگھی کرتا ہے۔ وہ طرح طرح کی بلائوں سے محفوظ رہتاہے اور اس کی عمر دراز ہوتی ہے‘‘ اور یہ بھی مروی ہے کہ جو اپنی ابرو (پپوٹا) پر کنگھی پھیر لیا کرے، وہ وباء سے امن میں رہتا ہے۔حضرت سیدنا علی المرتضیٰ کرم اللہ تعالیٰ وجہہ الکریم سے مروی ہے کہ حضور سید عالمﷺ نے فرمایا ’’کنگھی کیا کرو، کیونکہ اس سے فقر دور ہوتا ہے اور جو صبح کو کنگھی کرتا ہے (گویا کہ) شام تک امن میں رہتا ہے اور فرمایا کہ داڑھی مردوں کی زینت اور چہرہ کی خوشنمائی ہے‘‘ (مذکورہ)
بدنظر کی سزا
ابوعبداللہ نباحی سے ایک حکایت مروی ہے۔ وہ بیان کرتے ہیں کہ میرے پاس ایک خوبصورت اونٹ تھا، وہ ساتھیوں کے ساتھ جارہا تھا۔ میرے ہمراہیوں میں ایک شخص ایسا تھا جو نظربد لگانے میں مشہور تھا وہ جس اچھی چیز پر نظر ڈالتا وہ گر کر تلف ہو جاتی۔ مجھے لوگوں نے کہا کہ اپنے اونٹ کو اس شخص کے شر سے محفوظ رکھو۔ میں نے کہا کہ اسے میرے اونٹ پر کوئی قدرت نہیں ہے۔ جب اس شخص کو عبداللہ نباحی کی اس بات کا پتہ چلا تو وہ گھات میں رہا۔ ایک بار عبداللہ نباحی موجود نہ تھے، وہ شخص ان کی قیام گاہ پر آیا اور اونٹ پر نظر بد ڈالی۔ اونٹ اس طرح تڑپ کر گر پڑا۔ جس طرح جڑ سے اکھڑا درخت گرپڑتا ہے۔ نباحی کو خبر کی گئی کہ بدنظر نے اونٹ کو نظربد لگا دی ہے وہ آئے اور بدنظر شخص کو دیکھ کر پڑھا: حَبَسٌ حَابِسٌ وَ شَجَرَ یَابِسٌ وَ شَھَابٌ قَابِسٌ رُدَّتْ عَیْنَ الْعَائِنِ عَلَیْہِ وَعَلٰی اَحَبِّ النَّاسِ اِلَیْہِ (ساتھ یہ سورۂ ملک کی آیت) فَارْجِعِ الْبَصَرَ ھَلْ تَریٰ مِنْ فُطُوْرٍ ثُمَّ ارْجِعِ الْبَصَرَ کَرَّتَیْنِ یَنْقَلِبْ اِلَیْکَ الْبَصَرُ خَاسِئًا وَّ ھُوَ حَسِیْرٌ عبداللہ نباحی کا یہ دعا پڑھنا ہی تھا کہ اس بدنظر کی آنکھ اپنے حلقہ چشم سے نکل کر باہر گرپڑی اور اونٹ تندرست ہوکر کھڑا ہوگیا۔ (مدارج النبوۃ جلد اوّل)
قولنج سے بچائو
کتاب البرکۃ میں حضرت نبی کریمﷺ سے مروی ہے کہ حمام سے نکل کر قدموں پر ٹھنڈا پانی ڈالنا قولنج سے امن میں رکھتا ہے۔ (مذکورہ)
دردِزِہ سے بچائو
ابن سنی نے حضرت امام زین العابدین رضی اللہ عنہٗ سے نقل کیا کہ حضرت سیّدۃ النساء نور چشم مصطفےٰ فاطمۃ الزہرا رضی اللہ تعالیٰ عنہا کو درد زِہ کی تکلیف تھی۔ حضور سیّد عالمﷺ نے ام المومنین حضرت ام سلمہ اور حضرت زینب بنت حجشؓ کو حکم دیا کہ وہ حضرت فاطمۃ الزہراؓ کے پاس جاکر آیت الکرسی، سورئہ فلق اور سورئہ الناس پڑھیں۔ (تفسیر درمنثور بحوالہ تفسیر نعیمی، جلد سوم)