(۱)حضرت ابودرداءؓ سے روایت ہے کہ نبی کریمﷺ نے ارشاد فرمایا جس نے سورئہ کہف کی شروع کی دس آیات یاد کرلیں۔وہ دجال کے فتنے سے محفوظ ہوگیا۔ اور ایک روایت میں سورئہ کہف کی آخری دس آیتوں کے یاد کرنے کا ذکر ہے۔ (مسلم)
(۲)حضرت ابودرداءؓ روایت کرتے ہیں کہ نبی کریمﷺ نے ارشاد فرمایا جس نے سورۂ کہف کی شروع کی تین آیتیں پڑھ لیں وہ دجال کے فتنے سے بچا لیا گیا۔ (ترمذی)
(۳)حضرت ثوبان رضی اللہ عنہٗ سے روایت ہے کہ نبی کریمﷺ نے ارشاد فرمایا جو شخص سورۂ کہف کی آخری دس آیتیں پڑھ لے تو یہ پڑھنا اس کے لیے دجال کے فتنے سے بچائو ہوگا۔ (عمل الیوم والیلۃ للنسائی)
(۴)حضرت علی رضی اللہ عنہٗ فرماتے ہیں کہ رسول اللہﷺ نے ارشاد فرمایا جو شخص جمعہ کے دن سورۃ کہف پڑھ لے وہ آٹھ دن تک یعنی اگلے جمعہ تک ہر فتنہ سے محفوظ رہے گا، اور اگر اس دوران دجال نکل آئے تو یہ اس کے فتنہ سے محفوظ رہے گا۔ (تفسیر ابن کثیر)
(۵)حضرت ابوسعید خُدریؓ روایت کرتے ہیں کہ رسول اللہﷺ نے ارشاد فرمایا جس نے سورئہ کہف کو (حروف کی صحیح ادائیگی کے ساتھ) اس طرح پڑھا، جس طرح کہ وہ نازل کی گئی ہے تو یہ سورت اپنے پڑھنے والے کے لیے قیامت کے دن اس کے رہنے کی جگہ سے لے کر مکہ مکرمہ تک نور بن جائے گی۔ جس شخص نے اس سورت کی آخری دس آیات کی تلاوت کی پھر دجال نکل آیا تو دجال اس پر قابو نہ پاسکے گا۔ (مستدرک حاکم)
(۶)حضرت ابن عمر رضی اللہ عنہما سے روایت ہے کہ رسول اللہﷺ نے فرمایا ’’جو شخص جمعہ کے دن سورئہ کہف کی تلاوت کرے گا، اس کے قدم سے لے کر آسمان کی بلندی تک نور ہو جائے گا، جو قیامت کے دن روشنی دے گا، اور گزشتہ جمعہ سے اس جمعہ تک کے اس کے سب گناہ معاف ہو جائیں گے۔ (صغیرہ گناہ مراد ہیں)۔ (مجموعہ افادات: شیخ الاسلام مفتی تقی عثمانی مدظلہ)
(۷)سورۃ کہف پڑھنے سے گھر میں سکون و برکات نازل ہوتی ہیں۔ ایک مرتبہ ایک صحابیؓ نے سورۃ کہف پڑھی، گھر میں ایک جانور بھی تھا۔ وہ بدکنا شروع ہوگیا، انہوں نے غور سے دیکھا کہ کیا بات ہے؟ تو انہیں ایک بادل نظر آیا جس نے انہیں ڈھانپ رکھا تھا۔ صحابیؓ نے اس موقع پر ذکر جب نبی کریمﷺ سے کیا تو آپﷺ نے فرمایا: اسے پڑھا کرو، قرآن پڑھتے وقت سکینت نازل ہوتی ہے۔ (بحوالہ:صحیح بخاری، فضائل سورۃ الکہف، مسلم، کتاب الصلوٰۃ، بقراءۃ القرآن، تفسیر مسجد نبوی ،ص799)
(۸)اگر کسی شخص کو رات کے وقت جاگنا منظور ہو اور کوئی جگانے والا نہ ہو اور خود بھی اٹھنے کی امید نہ ہوتو وہ شخص نماز عشاء کے بعد سورۃ الکہف پڑھ کر سو جائے۔ انشاء اللہ جس وقت اٹھنے کا ارادہ کرے گا اسی وقت آنکھ کھل جائے گی۔ (مجرب عمل ہے)۔ (وظائف الصالحین،ص70)
(۹)جو شخص قرض میں گرفتار ہو اور قرض اترنا مشکل ہوگیا ہو تو بعد نماز جمعہ سورۃ الکہف سات بار پڑھے اور اللہ تعالیٰ سے پوری توجہ اور یکسوئی کے ساتھ دعا مانگا کرے۔ انشاء اللہ اس کا قرض اتر جائے گا۔ (وظائف الصالحین، ص 70)
(۱۰)سورۃ الکہف کو لکھ کر ایک بوتل میں ڈال دیں اس بوتل کو گھر میں رکھنے سے محتاجی اور قرضہ سے نجات ملے گی اور اس کے گھر والوں کو کوئی نقصان نہ دے سکے گا۔ گھر دشمن کے شراور خطرے سے محفوظ رہے گا۔ (اعمال قرآنی، صفحہ نمبر94، حصہ دوم)