انسان اگر غور کرے تو اللہ نے دنیا کی ہر چیز میں سبق رکھا ہے جس سے انسان کو ئی حکمت کی بات سیکھ سکتا ہے۔ہماری زندگی میں بہت سے ایسے مواقع آتے ہیں جب اللہ ہمیں اپنی طاقت اور قدرت کا احساس دلاتا ہے، ایمان والوں کو ایسی نشانیوں سے مزید تقویت ملتی ہے۔میں نے بھی اپنی زندگی میں اللہ کی قدرت کے ایسے کچھ واقعات آنکھوں سے دیکھے ہیں۔ربیع الاول کی نسبت سے درود پاک کا ایک حیرت انگیزواقعہ لکھ رہا ہوں۔
کائنات کے راز
درود پاک کی عظمت تو ہر مسلمان کے دل میں ہے، مسلمان کا ایمان کمال تک اسی وقت پہنچتا ہے جب اس کے دل میں درود پاک کا عشق اور درود پڑھنے کی طلب ہوتی ہے۔درود پاک پڑھنے والے کی دنیا کی کوئی خواہش ادھوری نہیں رہتی۔ درودپاک پڑھنے والے کو رسول اللہ ﷺ کا خاص الخاص قرب ملتا ہے۔درود پاک پڑھنے والے کو روحانیت میں مقام اور بلندی ملتی ہے ۔اس پرکائنات کے وہ راز کھلتے ہیں جو کسی اور پر کھل ہی نہیں سکتے ۔ درود پاک کائنات کے خزانوں کی چابی ہے، درود پاک سے علم و حلم کے دروازے کھلتے ہیںا ور اللہ پاک انوکھے علوم عطا فرماتا ہے۔تمام اولیاء اور روحانی ہستیاںدرود پاک پڑھنے والے سے محبت کرتے ہیں، خوابوں میں ملاقات کرتے اور بشارتیں دیتے ہیں، درود پاک پڑھنے والے کی نظر سے پردے ہٹ جاتے ہیں اسے کشف ملتا ہے،اسے معرفت کے راز ملتے ہیں۔ درود پاک سے محبت کرنے والا کائنات کا سب سے خوش نصیب انسان ہوتاہے۔ درود پاک سے محبت کرنے والے کے سامنے دنیا کی ہر چیز مسخر ہو جاتی ہے، درود پاک پڑھنے والےکو سب سے بڑا انعام یہ ملے گا کہ اسے جنت میں نبی کریم ﷺ اور آل رسولؓ و اصحاب رسولؓ کا قرب ملے گا۔یہ ایک ایسا مبارک عمل ہے جس سے صرف آخرت ہی نہیں بلکہ دنیا بھی سنور جاتی ہے۔ درود پاک کی برکت کا آنکھوں دیکھا واقعہ پیش خدمت ہے ۔
بزرگ خاتون کی نصیحت نے زندگی بچا لی
ہمارے رشتہ دار میں ایک عورت حاملہ تھی۔ ان کی ڈلیوری کا وقت بھی قریب تھا۔ اچانک ان کا بلڈ پریشر بہت زیادہ ہائی ہو گیا، ساتھ ہی الٹیاں بھی شروع ہو گئیں۔ڈاکٹر کے پاس لے کر گئے تو ڈاکٹر نے جواب دے دیا اورانہیں فوراً لاہور لے جانے کا مشورہ دیا۔ انہیں جھٹکے لگ رہے تھے اور ان حالت دیکھ کر کوئی نہیں سوچ سکتا تھا کہ یہ زندہ رہیں گی۔ جب لاہور کے ایک بڑے ہسپتال میں لے کر پہنچے تو ڈاکٹر نے معائنہ کرنے کے بعد کہا کہ ماں اور بچہ دونوں کو خطرہ ہے ،ہم پوری کوشش کے بعد بھی کسی ایک کو بچا سکتے ہیں ، آپ لوگ دعا کریں ، اللہ اگر کوئی معجزہ کرے تو ہی کچھ ہو سکتا ہے۔
ہمارے ساتھ ایک بزرگ خاتون تھیں انہوںنے کہا کہ سب مل کر313 باردرود تنجیناپڑھیں۔سب نے درود تنجینا پڑھنا شروع کر دیا۔ ہم نے بھی ایک سو بار ہی پڑھا تھا کہ ڈاکٹر نے کہا کہ ماں اور بچہ دونوں ٹھیک ہیں اور بچہ بھی نارمل ڈلیوری سے پیدا ہو ا۔ ماں اور بچہ دونوں خطرہ سے باہر ہیں ۔اللہ نے درودکی برکت سے خاتون کو نئی زندگی عطا کردی۔
نوٹ :درود تنجینا درود پاک کے کتابچوں میں عام مل جاتا ہے۔