حضرت حکیم صاحب السلام علیکم!اپنے بڑوں کے کچھ آزمودہ تجربات قارئین کی خدمت میں تحریر کر رہی ہوں جو سالہا سال سے آزما کر نفع پا رہے ہیں۔
زخم ختم کرنے کا دیسی ٹوٹکہ
بچپن میں نے بڑوں کو اکثر ایک نسخہ استعمال کرتے دیکھا کہ اگرکسی کو زخم ہوتا یا چوٹ لگتی تو وہ سرسوں کے تیل میں تھوڑی سی ہلدی ڈال کے بھون لیتے اور روئی کی مدد سے زخم کی ٹکور کرتے ‘پھر روئی کو خوب تر کر کے اسی گرم تیل میں زخم کے اوپر رکھ کے کپڑے کی پٹی اوپر باندھ لیتے اور پانی سے بچانے کی تاکید کرتے۔جو زخم ہفتوں دوسری دواؤں سے ٹھیک نہ ہوتا ہو، وہ اس ٹوٹکہ سے چند دنوں میں ٹھیک ہو جاتا ہے۔
گڑ اور صابن کا مرہم
اکثر گرمیوں میں اور بالخصوص برسات کے موسم میںکچھ لوگوںکے جسم پر بڑے بڑے دانے نکل آتے ہیں جن میں ریشہ وغیرہ موجود ہوتا ہے۔ ہمارے بڑے اس کا علاج اس طریقہ سے کرتے ہیں آئیں جو آج بھی جاری ہے وہ یہ ہےکہ گڑاور کپڑے دھونے والا صابن، ہم وزن لے کے اس کو خوب مکس کر کے مرہم سا بنا لیں‘رات کو ململ کا اتنا کپڑا لیں جو دانوں کو صحیح ڈھانپ سکے۔ اس پر مرہم کا موٹا لیپ کر کے چند سیکنڈ کے لئے آگ کے قریب رکھ کے گرم کر لیں اور دانوں کے اوپر رکھ کےپٹی باندھ لیں‘صبح پٹی کھول دیں‘ساراگندا مواد نکل جاتا ہے اور دانے ختم ہو جاتے ہیں۔
اعمال سے کام بنوائیں
اگر کسی شخص سے کوئی جائز بات منوانی ہو تو تین بار تیسرا کلمہ اور سات بار سورئہ نصر(پارہ 30) پڑھ کرمطلوبہ شخص کی روح کو ہدیہ کریں‘ ان شاءاللہ آپ کی بات رد نہ ہو گی۔اگر کوئی شخص ناراض ہو اورنہ مان رہا ہوتو اسے منانے کے لئے بھی یہی عمل کریں‘ ان شاءاللہ ناراضگی دور ہو جائے گی۔